《桃太郎》故事大家耳熟能詳，亦都有唔少以佢為藍本推出嘅遊戲。日前由雲豹娛樂公開嘅新作《ONI》（暫稱）同樣以《桃太郎》故事為藍本，不過就唔係扮演桃太郎 & Friends，而係扮演被佢打敗嘅惡鬼一族，換個角度玩都幾得意。

《ONI》由新工作室 KENEI DESIGN 開發，係一款立體動作遊戲，採用第三身視點。遊戲改編自日本知名童話故事《桃太郎》，玩家將扮演喺大戰中打輸嘅惡鬼「空太」，流落到「鬼世島」並與拍檔「風丸」相遇，兩人同心合力克服考驗，獲得新力量並向桃太郎報仇雪恨。

作為一款日本童話故事，遊戲場景以及敵人都充滿「和味」，預告片入面嘅神社、與之對戰嘅石獅等都好「日本」，而且感覺上同《薩爾達》有幾分相似。現時雖然發佈資訊唔多，但係透過影片中見到攻擊模式都係大家見慣見熟嘅「攻擊+迴避」模式，動作老手應該秒上手。

值得一提嘅係本作製作人係今年三月先離開 SIE Japan Studio 嘅山本正美先生，佢曾經參與製作《勇者有點太囂張》及《TOKYO JUNGLE》，實力與經驗兼備，令人對本作信心大增。

《ONI》預計於 2022 年推出，對應平台未定，支援繁體中文。