由西班牙工作室 Protocol Games 於 2019 年於 PC 平台上推出的恐怖解謎遊戲《Song Of Horror（恐懼之歌）》（報導按此）已於 2021 年 8 月 26 日推出對應繁體中文嘅家用機版本。

《Song of Horror》以 90 年代作為時代背景，故事大綱講述著名作家在收到一個神秘音樂盒後，於大宅裡與家人失去蹤影。出版社派出員工 Daniel 前往探視，卻從此音訊全無。

為咗尋回失蹤嘅人們，玩家將分別飾演不同角色，先後進入大宅之中，卻接連遇到各樣怪事。

遊戲中會有部份敍事式過場靜態影片

呢啲角色都與大宅本身或者出版社有著各樣關聯，上至 Daniel 的前妻、上司，去到大宅的僕人等等；而角色於大宅裡面嘅行動係會傳承（或影響）到下一位角色嘅探索過程當中。

例如玩家操作第一位角色，如果已搵到鎖匙打開鎖上嘅門、或者解開咗某啲線索；就算該位角色死亡後，下一位操作嘅角色都會享用返「前人種樹」嘅成果。

已解鎖嘅門會一直打開

頗有心思嘅係，操控唔同角色時，即使玩家與相同物品進行互動，唔同角色嘅反應或感受都會有所不同，呢度可見工作室製作文本時嘅心思；而角色自身嘅能力值（例如藏匿能力）都有微細分別，確保玩家唔會因為重覆探索而感到千篇一律。

不過，如上文提及，角色係會死亡的。《Song Of Horror》於劇情安排、系統玩法上面都可以稱為「本格派恐怖遊戲」，傳統而具有層次。然而，有別於傳統嘅設定，相信係角色「永久死亡」呢一點。遊戲當中共設 13 位可操控角色，難度則分為四種；除非玩家揀選「簡單」難度，不然角色一旦在大宅中遇上惡靈攻擊而死亡，就不會再有復活的可能性。

每使用一個角色都會好擔心幾時會整死佢…

遊戲嘅恐怖程度可以話係隨住劇情推進而增加的，遊戲裡面嘅惡靈會學習了解玩家探索嘅習慣，從而改變出現嘅頻率（當然都視乎玩家選定嘅遊戲難度）；黑暗大宅、複雜嘅地圖設定、立體而陰森嘅音效等等元素，玩家於大宅中逗留時間越耐，緊張惡懼嘅程度亦會容易隨住心理壓力而增加。

未重啟電力之前摸黑進入房間？要小心……

今次嘅家用機繁體版本對於唔擅於以英語進行遊戲嘅玩家絕對係不容錯過嘅選擇，遊戲嘅文本量唔算好多，只係好多謎題嘅提示都以文字寫成，假如有中文，對港台玩家黎講應該會輕鬆不少。遊戲嘅謎題唔算難，不過唔少謎題都無明顯嘅提示，去到遊戲後期，玩家「成手都係嘢」時可能需要多啲思考。

謎題有各種類型，例如要收集洋娃娃、計加減數、合拼道具使用等等

美中不足嘅係，家用機版本嘅操作敏感度有改善空間，例如玩家要開門、或者與物件互動，好多時都要企到正一正去調較角度，呢一點對於恐怖遊戲黎講，可能有少少令玩家出戲。同時 PS4 版本的 Loading Time 頗長，希望能夠於日後更新時改善。

每次開門都要企到正！

講返故事本身。本文並唔會劇透任何一個情節，不過喺「大宅之謎」「失蹤」呢啲本格恐怖要素以外，工作室仲於遊戲中加入咗唔少「克蘇魯」嘅要素（遊戲難度係以作家名字分類的，當中最高難度正正用咗「克蘇魯」原作者 H.P. Lovecraft 的名字）。可惜遊戲無加入 SAN 值等等理智值設定，如果唔係難度一定更具挑戰性。

到底玩家可唔可以搵齊人兼全身而退？

雖然《Song Of Horror》早已推出 PC 版本，不過今次推出嘅 PS4 版本相信會更適合想玩繁體嘅朋友，遊戲於 2021 年 8 月 26 日已經上架，有實體版本及數位版本。