講到主題樂園建設經營遊戲，有返咁上下機齡嘅朋友相信會第一時間諗起《RollerCoaster Tycoon》（模擬樂園），超高自由度加上虐待顧客嘅玩法令遊戲一直長青。日前由香港萬代南夢宮娛樂發表樂園模擬新作《Park Beyond》，以更易遊玩嘅方式呈現，鍾意玩「精神時光屋」類型朋友留意啦！

《Park Beyond》由德國團隊 Limbic Entertainment 開發，係一款主題樂園經營模擬遊戲。遊戲中玩家嘅工作就係管理一個主題樂園，由設計、建造到營運達致收支平衡等等，而本作最大特點係除咗有正常嘅挑戰任務，仲會有遊玩達 30 小時嘅故事模式，當中會遇見各種角色，面對形形色色嘅任務及營運難題，並從中教導玩家各種遊戲操作細節，唔會話無目標得個「起」字。（爆機之後有「沙盒模式」可以任玩）

作為一款樂園建設遊戲，可以起邊類型遊樂設施自然係重點。本作嘅創作意念就係以天馬行空為主旨，加入喺現實世界中不能實現嘅諗法，不過仍然跟隨物理法則。例如「砲彈過山車」有部份路段係無路軌的，過山車要加速「飛」過去，但整個設計依然係跟返物理慣性；「超巨型旋轉木馬」則變成一節節構造，都係有根據嘅想法。

雖然遊樂設施想法突出，但係玩家就無法參與設計過程，設施都係有固定嘅升級路線，例如多層式摩天輪就係用升級增加層數，但係玩家無法指定新增層數、尺寸等。幸好過山車路軌可以由玩家設計，基本上只要係園區內就鋪得，亦可以設計飛越空中嘅路段，更可以與部份遊樂設施整合，最正嘅係玩家可以用第一身視點做乘客，親身試下自己嘅作品，睇下自己頂唔頂得順。

當然，要整主題樂園唔係一味加機動遊戲就得，要令樂園持續營運就要根據「報告會議」，再更改營運方針。針對不同客群，按需規劃設施及商店，設定票價，員工薪金、裝備、訓練等等，適當時貸款，久唔久幫園區做主題包裝（例如「西部世界」），就好似現實主題樂園咁，要保持新鮮感同時要顧及資金、回本期等等。

《Park Beyond》預計於 2022 年推出，對應平台為 Xbox Series X|S、PS5 及 PC，對應繁體中文。