【遊戲介紹】勁有意義貓貓手遊《貓逝 Losing Cats Way》台灣原創貓咪社群經營養成遊戲

近年有極之多人移民，當中有為數不少食屎大嘅賤人因為要移民而棄養家中嘅寵物，令到呢啲小動物痛失家園甚至流落街頭。由台灣獨立團隊製作嘅遊戲《貓逝》（Losing Cats Way）就係一款以收養流浪貓為主軸嘅休閒向社群互動養成手機遊戲，貓貓們不但可愛非常，遊戲中更教導正確嘅養貓知識等觀念，更會將收益捐出去幫助相關機構，極有意義。

《貓逝》由台灣獨立遊戲團隊 0.5工作室製作，係一款社群經營養成遊戲。遊戲舞台位於一個叫福爾喵沙嘅世界，玩法就以收養流浪貓為主軸，每當玩家收養一隻貓，都會令整個環境變得更美好，最終目標係令福爾喵沙成為對貓咪友善嘅生態樂園。

遊戲中當玩家遇上流浪貓喵，首先就係耐心觀察，選擇正確策略，卸下貓貓嘅心防後將之誘捕，然後幫佢節育。成功將貓貓收服就可以帶佢返屋企，如果佢好抗拒，都可以帶佢去收容所等有心人領養，當然你都可以去收容所探下佢。喺遊戲入面不論收容、飼養等流程都係基於正確基礎知識設計，而且亦都教導大家只要貫徹收容同絕育觀念，先會令呢塊土地變得對貓咪們更加友善，令每隻貓咪都有個家。

要帶貓貓返屋企，自然就要幫屋企整得靚靚。遊戲中有多達七十多種房間同幾十種裝飾供任意配搭，當空間進一步擴充後就可以提升領養貓貓嘅數量，亦可以邀請朋友同佢哋貓玩。當然，剷屎、剪指甲、陪貓玩等日常工作都要做啦。另外遊戲中嘅貓貓會以類似《動物森友會》嘅形式隨機產出，不但血統有所分別，就連外觀同個性都會有所不同，根據官方所講會有超過三十六萬種組合，應該都幾難「撞貓」。

養得貓貓自然係要照顧到佢生命完結，當貓貓離去之後，玩家會得到貓貓專屬花色嘅尾巴盆栽同埋一本日記，入面記錄著佢嘅貓生，以及想同你講嘅說話，提醒大家要珍惜有貓相伴嘅日子。最後想講嘅係呢款遊戲目前喺嘖嘖平台募資，雖然已經達標，但仍然建議大家支持一下，因為扣除團隊營運費用外，總經費將依固定比例以捐款形式提供予「台灣之心愛護動物協會、台灣貓狗勸募平台」，喺現實世界幫助其他小動物，極具意義。