《貪食蛇》呢隻遊戲歷史悠久，喺古時更加係軍事武器跟機遊戲黎，雖然大家都好熟悉呢款遊戲，但係就從來無人諗過當貪食蛇變為立體版本會點。今次介紹嘅遊戲《Temple of Snek》就係用傳統貪食蛇為藍本，以立體方式重現，老實講睇落真係幾得人驚！

《Temple of Snek》由 Aetheric Games 開發，係一款有 Rouge 元素嘅迷宮探索解謎遊戲。玩家喺遊戲中當然係操作貪食蛇，不過就係巨型版本。你嘅工作就係坐鎮於神殿內，保護女神絲內可並且抵禦掠奪者及盜墓者，將一切吞噬再成長……

遊戲玩法同傳統貪食蛇類似，喺劃分成方格嘅地圖中以上下左右四個路徑移動，當吞食入侵者之後就會變大。至於地圖嘅大細同寶箱位置會根據蛇嘅長度同移動速度隨機調整，而且仲有特定 NPC 提供謎題。除咗以上特式，正式版會提供五個神殿地圖以及關卡編輯器，可以自行設計關卡。

《Temple of Snek》目前正進行搶先體驗，對應平台為 PC Steam，支援繁體中文。