早前同大家介紹過（報導按此）一隻吉卜力風格嘅 RPG 遊戲《Baldo The Guardian Owls》，遊戲極有 Level 5 工作室《二之國》系列嘅味道，因此公佈之後受到玩家注目。

不過，遊戲於 2021 年 8 月 27 日推出之後劣評如潮，於 Reddit 上面更係罵聲不斷。編輯部於遊玩一輪之後都深感失望，內容如下，排名不分先後：

1）操作敏感細緻度不足

遊戲整體氛圍其實是吸引的，雖然畫風多少有點粗略，但是以 Indie 遊戲而言可以接受。不過，操作手感非常不友善。作為一隻解謎為主、動作為次的 RPG 遊戲，作品裡有唔少情節，玩家都需要搬動物品去進行解謎、或者投擲去攻擊敵人。

但係，角色動作相對 AI 敵人黎講較為遲緩，好多時你知道要點樣通過某啲地方，但係因為角色反應動作唔夠快，結果你要枉死幾次。

同時，唔少謎題，或者隱藏通道，需要玩家推動地上木箱去解鎖。不過，遊戲中，無論係「可動」或者「不可動」的木箱，都會出現「推動」的選項，咁既然你個箱唔係用得嘅，你出個「推動」嘅選項比我做乜？！

其次，玩家只能滾動，不能跳躍。但係遊戲裡面嘅高低差做得比較微妙，例如序章有一個支線，你要幫村民搵返兩隻迷路嘅雞，其中一隻雞喺屋頂，玩家需要繞過大樹，經由一條有草叢阻礙你前進嘅窄小道路去執雞。

其實遊戲原意應該係想玩家捧住隻雞原路折返，但係由於系統寫得唔夠細緻嘅關係，玩家一旦捧住隻雞，就唔可能原路返去了，你會卡喺屋頂，上唔返平地。

只能取巧地將雞放到接近平地嘅位置，自行調教位置，兜大圈上返平地，先執得返隻雞去交差。

2021 年了，點解仲有咁唔 Friendly 嘅設計？

2）固定視角不夠 User Friendly，玩家容易從高處跌死

遊玩角度固定唔係問題，但係當玩家去到某啲邊緣位置時，你理應將邊緣嘅貼圖｜物品變成透明，玩家先至可以推測到「此路通與不通」。但係，遊戲中並無做到咁細緻嘅設定，玩家變相好易跌死｜跌落陷阱死亡。

3）BUG 數頗多

遊戲中嘅謎題，並唔似《薩爾達傳說：荒野之息》嘅神殿謎題咁，玩家有時可以運用小聰明去解題。《Baldo》嘅解謎只得一個解法，靈活度欠奉，仲因為系統嘅問題，好多時你做完需要嘅步驟，但係 Bug 咗，導致應該要觸發嘅嘢無出到黎。

4）按鍵設定微妙

遊戲本身大概係為咗手機平台而開發，於是搬落家用機時，好多操作嘅按鍵，都同玩家慣常使用嘅不同，變相影響遊戲體驗（雖然上面提及嘅缺點都足以令人退 Game）

5）只能調較音樂聲，音效聲卻不能調整

點解去到 2021 年都仲會有遊戲只能較 BGM 大細聲，而無得較音效嘅聲量大小？

6）無得手動 Save，但 Auto Save 嘅時間點怪怪的

RPG 遊戲，一係可以隨街 Save，一係就有固定 Save Point。但係《Baldo》兩樣都無。你唔會知佢幾時幫你 Save 咗，呢一點都令玩家有少少頭痛。

平心而論，其實故事主題係幾吸引，我都好想知道故事發展係點；不過，遊戲性實在太多瑕疵，令人卻步。目前遊戲於 Steam 平台上面，只有 40％ 玩家給予遊戲「好評」。對於《Baldo: The Guardian Owls》呢隻作品，我會形容為「可惜」，以上提及嘅幾個要點，真係打消咗我繼續攻略遊戲嘅耐心。假如玩家仲係有心一戰，而又抱持正評想法的話，都好歡迎你撰文同我地分享！