預計於 2022 年上架嘅 FromSoftware 高難度動作遊戲《Elden Ring（艾爾登法環）》相信係唔少玩家期待之作。《Elden Ring》於公佈初時，宣佈與《Game Of Thrones（小說原譯：冰與火之歌）》原作者 George R.R. Martin 合作，令到唔少玩家都以為遊戲內文字均由該位作家撰寫。

不過，早前 FromSoftware 市場規劃部門主管北尾泰大先生接受外媒 IGN 採訪時就表示，George R.R. Martin 只負責架構《Elden Ring》嘅世界觀以及人物設定，遊戲內嘅文本，包括對白、故事描述等等，原來均由工作室領頭人宮崎英高製作人親自撰寫。

George R.R. Martin 於《Elden Ring》構思初期，已完成佢嘅工作，包括為遊戲設計出獨特嘅世界觀、架空嘅歷史背景、人物之間嘅關係脈絡等等；而佢本人亦表示，自己負責嘅部份已完成，與 FromSoftware 嘅合作工作亦已經結束。

不過對於 Fans 黎講，遊戲文本由宮崎英高製作人親自撰寫，可能為遊戲更添一份吸引力，畢竟宮崎獨有嘅暗黑世界觀，已為旗下遊戲屢創經典。《Elden Ring》為編輯部極為期待嘅作品之一，有新消息會再為大家報導。