《Dark Souls》系列相信係唔少喜愛挑戰高難度遊戲嘅朋友心中經典，市面上亦有唔少遊戲深受啟發，從而衍生各種「類魂系」嘅高難度動作遊戲。Point Blank Game 工作室早前公開旗下新作《Stray Blade》嘅遊玩影片，並宣佈遊戲將會於 2022 年正式推出，實際推出日期有待公佈，對應平台為 Xbox Series X｜S、PS5 及 PC。

《Stray Blade》於 Gamescom 2019 時初次公佈，不過公佈後一直未有消息，直至早前先至公開新影片。工作室形容遊戲嘅動作系統深受《Dark Souls》系列啟發，高難度之餘亦重視玩家嘅反應同動作技巧，死亡後需要從儲存點重新開始等等元素亦都係參考魂系遊戲設定。

不過，工作室並唔想只係開發出一隻彷製品，因此《Stray Blade》並無《Dark Souls》一樣帶有極為沉重暗黑嘅世界觀，遊戲使用更多元化的色彩表現，而玩家嘅動作敏捷度亦會有所提昇，希望玩家能夠在當中獲得不一樣的體驗。

玩家於遊戲中飾演一位冒險者，與一隻戴著面具的狼「Boji（辛諾狼布基）」同行。遊戲舞台名為「Valley of Acrea（亞欽山谷）」，山谷為一片古老嘅歷史區域。玩家需要於旅程中獲得並了解三種亞欽金屬（Acrean Metal）嘅力量，去為呢片飽受戰亂所害嘅荒地尋回平衡嘅生活。

《Stray Blade》目前已於 Steam 開設專屬頁面，對應繁體中文。遊戲預定 2022 年正式推出，對應平台為 Xbox Series X｜S、PS5 及 PC。