希臘神話大家應該玩唔少，上年隻《芬尼克斯傳說》、大熱作品《Hades》都係用希獵神話背景，不過都係用返刀劍弓之類，好少話會用現代槍械（《Hades》果把係「弩」黎）。今次介紹嘅遊戲《PERISH》就係結合希臘神話同 FPS 嘅作品，加上可以多人連線，新鮮感十足。

《PERISH》由 ITEM42 開發係一款有 Roguelite 元素嘅動作遊戲，採用第一身視點，支援四人連線合作。玩家扮演失去肉身嘅靈魂，沿途穿過破舊神廟、炙熱沙灘等地，一路過關斬將，目標係去極樂世界脫離苦痛。遊戲中玩家將手持可將敵人染金嘅武器，殺敵後再將屍體賣比祭司換錢，再解鎖更強大嘅武器幫助自己。

遊戲中殺敵之後可以用屍體換取「Danake」貨幣，好處當然係可以用黎買武裝，但因為煉獄中嘅亡魂對「Danake」極度渴望，身上累積大量金錢的話敵人攻勢會更猛烈，而因為本作有 Roguelite 元素，全滅的話所有錢、武器同道具都會無晒，夠晒緊張刺激。

《PERISH》暫時未有正式上市日期，對應平台為 PC Steam，有興趣嘅朋友可以先加入 Wishlist。