足球遊戲大家玩得多，玩法有自己落場踢、有經營球隊、連格鬥足球都有，不過就好似唔覺眼有得做球證。今次同大家介紹嘅《Referee Simulator》（裁判模擬器）就係要大家扮演球證，想公平公正咁做又得，想瘋狂黑哨又得，得咗！

《Referee Simulator》由 Goat Gamez 開發，係一款即時戰略模擬遊戲，採用第一身視點。遊戲中玩家將扮演足球球證，去為每場賽事仲裁。要做嘅野基本上同現實世界一樣，跟住球員周圍跑，睇實佢地有無犯規，遇到有爭議、越位時要睇 VAR 等等（仲有比人小），非常忙碌。

玩家要做嘅除咗上述工作，仲要兼顧球證嘅體力分配。喺本作入面球證係有體力同壓力兩個參數，無體力的話就會跟唔上球員奔跑嘅節奏，壓力過高的話就會令自己睇唔到比賽細節導致誤判。另外仲有一個球員對你嘅尊重數值，數值越高就越少爭執發生。

玩得呢隻 Game 嘅，相信大部份人都係諗住做黑哨，你可以對輕微犯規視而不見，即係大家睇波成日講「嘩咁都唔吹？！」，亦都可以小小事就俾牌，以上行為雖然可以影響比賽走向，但係賽後會有裁判委員會評估，亦有機會引起觀眾爭吵同不滿，而你嘅表現將取決於入世界盃做球證定係過街老鼠。

《Referee Simulator》未有確實發售日期，對應平台為 PC Steam，有興趣嘅朋友可先將之加入 Wishlish。