大家睇電影好多時都會有情節係揸車由一個州去另一個州，由於地方廣闊，喺公路上極長嘅駕駛時間真係乜野都有機會發生。今次介紹嘅遊戲《九十六號公路》（Road 96）就係一個圍繞公路所發生嘅故事，一班唔同嘅人都有住同一個目的而踏上公路，但當中所面對嘅事情千變萬化。現時喺 Steam 上已得到極度好評評價，無疑係一款上佳作品。

《九十六號公路》由獨立團隊 DigixArt 製作，係一款敘事冒險遊戲，採用第一身視點。遊戲故事發生喺 1996年夏天，一個叫做「皮特拉」嘅獨裁國家。政府對外宣傳國家有幾好幾正，但係完全同實際情況有天壤之別（同某個國家好似）。為咗逃離呢個國家，一班年青人決定踏上離家之旅，不約而同地都喺「96 號公路」上啟程，前往自由之地途中將經歷各種冒險，遇上唔同嘅人並交織新嘅故事。

遊戲中每前進一段距離就會面臨選擇，根據決定會影響之後旅程，會改變遇到嘅人、突發嘅情況、甚至影響世界局勢，而最差嘅情況係你會死亡，不過遊戲並唔會因此而結束。當玩家所扮演嘅角色死亡後，將會變為另一位準備逃向邊境嘅年青人，再喺近千條可選擇道路，遇上不一樣嘅人，做出不同嘅選擇，當然亦有可能遇到上一位少年遇過嘅人。

《九十六號公路》中並無特定章節與橋段，採用「非線性」劇情體驗，每次遊玩都有極多變數，加上 90 年代風格音樂，耐玩之餘仲好有味道。遊戲已於 8 月 16 上市，對應平台為 Nintendo Switch 及 PC Steam，對應繁體中文。