農場經營類遊戲絕對係長青種類，久唔久就會有一款新遊戲出現，今次為大家介紹嘅《Big Farm Story》推出短短時間就得到大多好評。遊戲畫風可愛，節奏輕鬆休閒，又可以同朋友連線共同努力，唔想成日打打殺殺，不妨轉下口味同朋友一齊種菜丫！

《Big Farm Story》由德國遊戲工作室 Goodgame Studios 製作，係一款農場管理經營遊戲，支援多人連線共同遊玩。遊戲講述玩家本身喺城市生活得好地地，突然間爺爺要你繼承佢間農場，點知去到嘅時候先發現農場周圍啲建築物冧晒、雜草叢生，根本就係被遺棄狀態，而且爺爺仲要消失得無影無踪。既然都返到黎，於是你就開始重建農場並搜尋爺爺嘅踪跡，努力耕田！

喺呢隻遊戲並無任何打打殺殺嘅元素，喺呢個咁和平嘅地方種下各種農作物並收割、養動物、煮食、同其他村民交流等活動，而本作最大特色係可以同其他玩家連線合作互相幫忙，亦可以去樹林中採花摘菇斬柴，極之悠閒。最正嘅係官方為咗保持遊戲嘅純粹，特別公告講明遊戲中唔會有任何微交易機制，希望玩家可以盡情體驗農場生活。

雖然睇落去好似漫無目的，但本作隨劇情推進會得到技能點數，根據自己遊戲風格可選擇提升手工藝、耕種或其他技能，成為更好嘅農夫定係強化廚藝成為烹飪大師等等。另外當儲夠資源時玩家可以建造自己設計嘅家，入面嘅家具、電器、裝飾品等全部可自訂。

《Big Farm Story》已於 8 月 2 日正式推出，對應平台為 PC Steam。