【遊戲評測】再次創造喪屍傳奇《Back 4 Blood》加入現代元素有舊作味道毒性甚高

萬眾期待，紅足十年嘅傳奇喪屍《Left 4 Dead》系列精神續作《Back 4 Blood》早排終於有得玩公測，由原班人馬製作果然不負眾望，保留舊作味道之餘加入大量現代元素，滿足舊 Fans 得黎又好玩，有望再次創造喪屍傳奇！

《Back 4 Blood》由 Turtle Rock 工作室制作，雖然上一隻作品《Evolve》猶如屎一般，但係今次回歸原點，做返拿手嘅第一身喪屍射擊遊戲就無令人失望。作為精神續作，少不免會拎黎同《L4D》比較，而 Turtle Rock 亦交足功課。基本 PvE 玩法沿用舊作模式，每關由安全屋出發，只要隊中有一人抵達下間安全屋 / 終點就算勝利，簡單易明。

今集安全屋唔再有免費藥包

雖然玩法主軸照舊，不過就加入非常多變化。開始前玩家要先揀定啱自己風格嘅角色，再設定相關嘅輔助卡片（砌 Deck）。角色選擇唔再好似以前咁睇樣做人，今次唔同角色會有自己專屬技能同被動天賦，加上輔助卡片，就會令角色產生唔同嘅玩法。例如坦型角色可以用殺敵回血、殺敵回耐力、增加抗性等加強坦力；亦可以加耐力上限、減少耐力消耗等等玩跑場引怪，玩法極之多變，而玩家們出戰前就要夾定大家玩咩角點定位，令組合更多變化更有新鮮感。（遊戲最高難度比起 L4D2 更難，唔夾的話基本上死硬）

卡牌系統令到遊戲變化更大，但亦有機會另 PvP 變得不平衡，希望正式版時不會出現呢個情況

怪物道具擺位全部隨機，每次遊玩都有新鮮感

除咗上面講嘅新野，喺每關開始後可以買各種道具、武器、輔助品等（明顯係參考自 CS 啦），要點用身上嘅錢都有考量，例如有 1-2 人買工具組，遇到有特殊房就可以使用，特別係呢類房好多時有免費醫療站（今集安全屋唔再有免費藥包）。另外今集嘅槍械唔再淨係得「種類」選擇，每把槍有品質之分，就算同一把突擊步槍都會有數值差別，而且可以安裝配件強化。可惜嘅係現時武器品質差異不大，就算係白裝上晒配件都可以用到後期，加上打擊感麻麻，希望正式版時會改善呢兩個問題。

每把槍有品質之分，圖為最 Cheap 嘅白裝

今集槍械分子彈種類，玩家們要互相配合使用槍械，唔用嘅子彈嘅可以掉落地比其他玩家

上面新增元素已經夠多，但係本作趣味未止於此。遊玩多場後，發現唔少更深入嘅技巧，例如最易發現嘅「複利」卡片（喺安全室會獲得額外 10% 金錢）。只要進入安全室前將金錢集中到有呢個技能嘅玩家，就會生效。唔好睇少呢 10%，集資 $4000 已經等於多一個藥包，非常有用。

另一個小知識係遊戲中所有類型子彈都有個叫「穿透力」嘅數值，不過手槍同霰彈槍效果好差，玩家可以透過輔助卡片增加子彈穿透力強化，能力可以強化到一粒子彈穿五隻以上，面對喪屍潮就非常有用。而配件亦都會令槍械能力微調，例如喺霰彈槍裝上滅聲器就會令子彈分布變得集中，打特殊感染者有奇效。當然除咗上述幾點，仲有大量有趣味細節，留待大家慢慢發掘啦。

呢三張卡片會增加「穿透力」，定點打喪屍潮非常有用

上面都係讚隻 Game 居多，不過佢仍然有缺點，而且呢個缺點係出自以往大受歡迎嘅 PvP 模式。喺今集 PvP 改為持久戰玩法，雙方輪流扮演生存者 / 特殊感染者，存活得較耐者勝。由於局限喺一個小場地，玩幾場就覺得悶。幸好特殊感染者今次有得玩「進化」，同一款特感可以有唔同分支，仲有得自己選擇強化咩技能，算係幾有趣，可惜現版本嘔吐者有點過強，平衡度需要調整。