極受香港人喜愛嘅美國動畫《衰仔樂園》（South Park）有遊戲新作消息啦！日前作者 Matt Stone 接受彭博社訪問時，爆料新遊戲開發中消息，雖然完全無透露相關內容，但係已經令人非常振奮！

根據彭博社報導，Matt Stone 喺訪問中提及現時有一款《衰仔樂園》（South Park）正在開發中，作品會係 3D 遊戲並由自家工作實進行開發，發售日期未定。《衰仔樂園》過去喺家用機曾經推出兩款作品《衰仔樂園：浣熊俠聯盟》（South Park: The Fractured but Whole）以及《衰仔樂園：真實之杖》（South Park: The Stick of Truth），兩款作品都係以平面方式遊玩同時極之歡樂，並且皆由 Ubisoft 發行。

現時雖然未有實際遊戲內容，但係由自家工作室負責，劇本絕對唔洗擔心，係怕 3D 模組未必整得好睇，要知道將 2D 作品變成 3D 好多時都未必合符玩家口味。