自從《星球大戰》面世後，用光劍格劍一直以黎都係受到大家歡迎嘅元素，喺唔同遊戲中亦都有類似嘅玩法，不過就硬係覺得少咗陣「爽」味。日前有款新嘅獨立遊戲《SpiderHeck》，用蜘蛛拎住光劍對戰，節奏快速講求技巧，仲支援四人對打，非常之唔錯。
《SpiderHeck》由 Neverjam 製作，係一款平面格鬥遊戲，不過就唔需要「Chok」招，主要係玩走位反應同戰術。遊戲中玩家將操作手握嘅蜘蛛，以擊敗對手成為場上最後存活嘅一「人」為目標，玩法簡單直接。由於玩家係蜘蛛，所以有返相同特性可於所有牆身上自由移動，或者吐絲「Fing」去第二個位置，操作上都幾講求技巧。
要擊敗敵人，攻擊手段同樣重要。手上嘅光劍除咗劈人之外，仲可以掉出去再用原力收返，當係迴力鏢咁用。除咗劍，玩家亦可以喺場上得到激光槍等武器，不過要手中無劍時先可以使用，而敵方如果手上有劍亦都可以反彈激光。另外場上其中一邊會有熔岩，而且會隨時間變化，利用場地陷阱亦都係致勝嘅戰術。
《SpiderHeck》會於近期正式推出，對應平台為 PC Steam。除咗最大四人單機同遊之外，亦有單人模式，現時開發者提供試玩版免費下載，可以試下先。
動漫電玩宅，極愛金田一系列，擅長動作及策略遊戲