對電子產品有認識嘅朋友，相信都知道喺長時間連續顯示影像或重複顯示相同影像時，有可能會發生永久性殘影現象，呢個情況同樣會發生喺採用 OLED 屏幕嘅任天堂 Switch 新型機上。日前外媒 CNET 向任天堂查詢，得到回覆承認以上問題無法避免，並提供應對預防方法。

Nintendo Switch 新型機由傳統嘅 LCD 屏幕變為有機 EL 顯示器 （OLED），呢種顯示器與需要背光嘅 LCD 屏幕相比，可以表現出更深黑色並具有高對比度以及生動嘅繪圖功能。但係由於有機 EL 面板特性，如果長時間顯示相同畫面，則有機會導致元件劣化並且可能發生殘影現象，而根據老化程度，殘像仲可能永遠存在。例如部份遊戲 UI 會持續出現喺畫面同一位置，每日 Keep 住長時間顯示靜止圖像就會有機會出現上述問題。

例如《NEOGEO Pocket》呢類遊戲，四邊黑色加機身就完全係靜止圖像，高危

任天堂回覆外媒 CNET 時，就話用戶可以採取預防措施保護屏幕。新機將會預設無操作五分鐘就會進入休眠模式，以及畫面自動調整亮度功能以防止屏幕變得太亮，只要唔好更改以上設定即可預防。但其實殘影問題同樣會發生喺 OLED 電視上（大家可以去睇下各大牌子官網都有提及），各大廠商會針對呢個問題加入面板更新、像素位移、螢幕保護程式等功能，不過暫時未知任天堂會否加入相關功能。

另外除咗 OLED 有隱憂，部份遊戲工作室亦都開始明言不滿新機並無強化機能。舊嘅有 Slighty Mad 工作室，近嘅就有 Larian Studios。早前外媒 3DJuegos 就有報導過將《神諭：原罪2》移植落 Switch 係佢地做過最困難嘅工作，並且話任天堂如果唔提供更強嘅硬件性能與記憶體，Switch 將會成為另一部 3ds – 完全脫離現實世界。