今次介紹嘅作品係由台灣製作嘅敘事解謎遊戲《傾聽畫語 – 最美好的景色》（Behind the Frame – The Finest Scenery），喺遊戲未推出前已經分別喺多個選舉中奪得獎項，加上之前 E3 活動曝光，令到遊戲得到極多玩家關注。日前推出嘅宣傳影片中，正式公布遊戲上市時間，並開放各版本上市前優惠。

《傾聽畫語 – 最美好的景色》由台灣曙光工作室獨立製作，係一款敘事解謎遊戲。遊戲劇情所表達嘅並唔係咩驚天地泣鬼神嘅壯大故事，講嘅係一位追逐夢想嘅畫家，喺日復一日作畫過程中，偶爾休息時嘆咖啡食件多士，與古怪鄰居老先生同可愛貓貓相處下，逐漸展畫作找回失去色彩嘅故事。當畫作完成後，慢慢回想過去毫無關聯但又熟悉嘅美好時光，係一款令人輕鬆舒服嘅作品。

遊戲玩法主要係透過填色、素描、修補繪畫作品，拼湊畫作與收藏其中嘅回憶，利用點擊與拖曳操作。喺敘事上本作以類似互動小說型式表達，配合靈感來自於宮崎駿美術視覺，令玩家沉醉於精美手繪動畫世界，加上悠揚配樂下，體驗平凡中見不平凡嘅故事。

由即日起至 8 月 24 日，喺 APP Store 或者 Google Play 預訂 / 預先註冊，就會得到預約禮品限定遊戲貼圖包同手機桌布。至於電腦 Steam 版都會有特價同專屬優惠，之後會喺商店頁面中更新發表，玩家可以先加入願望清單。

《傾聽畫語 – 最美好的景色》（ Behind the Frame – The Finest Scenery）8 月 25 日全球同步上市，對應平台為 PC Steam、iOS 及 Android，支援繁體中文。