講到打劫 Game 第一時間梗係諗起《Payday》，每次做案前要視察環境，同黨羽分工合作的確係非常過癮，但始終都係較偏向動作部份，前期策劃呢部份就無得玩。《Heist Simulator》係一款搶劫模擬遊戲，玩家要喺做案前策劃整個劫案細節，完全係一款食腦嘅遊戲！

《Heist Simulator》由 RogueCode LTD 同 SkyBagel 聯合開發，係一款策略動作冒險遊戲。遊戲中玩家要喺英國各地破解各種謎題及陷阱並偷取寶藏，事前要先策劃整個搶劫計劃，包括細項分工、利用駭客癱瘓系統、潛入避開保安設施及守衛或假扮工作人員等等，部份任務更會有特定目標及時間限制，勁有電影《盜海豪情》Feel！

除咗基本關卡外，遊戲提供「地圖編輯器」，資料庫有多達 8,500 種素材選擇，除咗檯櫈、雕像等擺設，亦有陷阱同謎題，甚至可加入賭客、觀光人士等 NPC，無論係賭場、美術館、餐廳都可以設計成你心目中嘅舞台。設計完成嘅關卡，可以上傳至官方雲端與其他玩家分享，當然亦可以下載其他人嘅作品，亦即係有無限咁多關。

《Heist Simulator》上市日期未定，但係 PC Steam 頁面上已經有 Playtest 測試，只要要求存取就可以免費得到搶先體驗資格。