塔防類一般都會分為齋起塔或者可以控埋個人落場打，今次介紹嘅遊戲《Orcs Must Die! 3》就屬於後者。遊戲中玩家要一邊控制角色落場打，一邊好似《影牢》咁周圍起陷阱防禦。上年喺 Google Stadia 已經推出並獨佔一年，而家終於喺多個平台上架，而且喺 Steam 仲得到「極度好評」評價，絕對係七月必玩佳作！

《Orcs Must Die! 3》由 Robot Entertainment 開發，係一款動作塔防遊戲，採用第三身視點，最多支援二人線上合作遊玩。雖然遊戲已經去到第三集，但係劇情係新故事黎，所以無玩過舊作都無問題。遊戲玩法就有少少似一般動作遊戲，開場前需要準備好角色使用嘅武器、道具同使用嘅陷阱，然後守住通道擊殺一波波嘅敵人。

戰鬥中玩家可以喺場上設置陷阱，設置型式類似《影牢》，主要分為地板、牆壁同天花板三個地區放置，每個地區有相應嘅陷阱。陷阱種類多元，有單純打傷害嘅、輔助緩速、擋路、位移等等，而且陷阱間可以有連鎖效果，例如焦油陷阱減速後再用火攻擊就會令敵人點燃；又或者用位移陷阱將敵人擊至場景陷阱等等，玩法多多任你發揮。

要設置陷阱，就要消耗點數，透過擊殺敵人或者高連擊就可以得到，玩家喺每次過關之後仲可以用點數強化武器、陷阱或者道具，除咗加攻減 CD 呢類野，達成特殊條件仲會開啟獨有升級選項，大大增加陷阱強度，所以玩家要考慮玩以量取勝定係品質先行。當然，玩家唔可以升死一種類型陷阱，因為敵人會有魔法或物理免疫類型，亦會有飛行類，所以面對不同敵人時要同朋友夾定對策，再決定起邊類型防禦工事。

除咗場上嘅陷阱，玩家自身都係一座超強力砲塔，除咗部份特殊武器之外，玩家嘅攻擊基本上係無限次數兼無 CD 限制，而且隨關卡推進仲會得到強大嘅武器，攻擊力強大之餘，部份武器更會有緩速等輔助效果。不過由於玩家自身有血量，太過勇猛的話反而會死，特別係用近戰武器就更加危險。最理想嘅玩法就係兩位玩家互相配合，夾埋各自用咩道具就最好。

《Orcs Must Die! 3》已於 7 月 23 日推出，對應平台為 Xbox Series X|S、Xbox One、PS5、PS4 以及 PCSteam。