立體遊戲轉視點係基本到爆嘅野，真係不值一提，但如果將轉視點呢個概念用喺平面遊戲入面，成件事就會變得好有趣。《Toodee and Topdee》需要隨時喺兩個平面間切換，利用兩個平面嘅特性，喺獨特視角之間解開謎題，新穎過癮。

《Toodee and Topdee》由 dietzribi 開發，係一款動作冒險解謎遊戲。遊戲講述宇宙本來係分為平面世界同俯視世界，但係一次意外令到兩個世界融合，於是佢哋就要合作令宇宙恢復平衡。遊戲目地非常簡單，就係於關卡中收集鎖匙並通關，但係整個過程係非常考腦筋的。

遊戲中玩家需要不停喺平面視角同俯視視角間切換，有趣嘅係呢個切換唔係單單轉變視角咁簡單，而係整個「維度」都轉變埋，喺轉變過程中不論係怪物定係場景屬性都會因為維度改變而有唔同嘅變化。例如平面世界時，玩家會以類似《Mario》型式操作，好多時太遠距離嘅平台係無法跳過去，呢個時候只要喺平面維度跳出去，喺半空時切換至俯視維度，拎舊踏腳石擺去平面維度角色腳下，切換返平面世界後就會企喺舊石上面。

至於怪物亦會隨維度改變行動模式，例如平面世界時怪物只會於平台邊緣來回走動，但係變成俯視維度時就會擺脫平面限制，可以全方位移動。利用呢種特性去克服各種謎題，就係呢隻遊戲好玩之處。除咗一般關卡有心思，仲有同樣用腦嘅 Boss 戰。最正嘅係單打唔掂仲有合作模式，同朋友一齊諗點玩係好好嘅體驗。

《Toodee and Topdee》預計於 8 月 4 日推出，對應平台為 PC Steam。