一般人講起 Golf Game 都係會諗起《全民高爾夫》又或者係早排出嘅《瑪利歐高爾夫》，但無論係邊隻都係正正常常打 Golf 嘅遊戲。今次同大家介紹嘅《What the Golf ?》其實已經推出咗好耐，係一款表面上係 Golf 但實際上完全亂黎嘅搞笑遊戲。遊戲高質但係香港就唔太多人識，而且最近有大型更新，係時侯為大家介紹下啦。

《What the Golf ?》由獨立團隊 Triband 開發，表面上係一隻高爾夫球遊戲，實際上係利用高爾夫概念衍生出大量不同類型遊戲嘅搞笑解謎冒險遊戲，支援單機多人遊玩。遊戲以高爾夫球主要元素「控制力道與方向」為基礎，同時跟返現實物理法則，但係打嘅唔再係波，而係變成各種特別嘅玩法，例如玩家揮桿之後打出嘅唔係個波，而係 Fing 自己出去咁。另外遊戲中有大量模仿大家熟悉嘅作品，再以新面貌呈現於大家眼前，如《Mario》、《貪食蛇》、《Clustertruck》（貨車上面跳黎跳去果隻）、《山羊模擬器》、《Portal》等等，全部用高爾夫嘅玩法重現，完全超出你想像！

最近遊戲實裝大型免費更新「A Hole New World」，內容包含大量新戰役、超過 50 個新關卡、1000 多個洞、新嘅遊戲機制，當然唔少得大量嘅搞笑文本。現時更新已實裝至 Apple Arcade，其他版本會於稍後時間實裝。

《What the Golf ?》已經推出，對應平台為 Nintendo Switch、PC Steam、iOS、MacOS、tvOS。