今年係《太鼓之達人》推出 20 周年，早前香港萬代南夢宮娛樂就搵黎樂富 Fullhouse Kitchen（滿屋廚房）合作，搞咗個「太鼓之達人主題餐廳」，編輯部前幾日就假借「做嘢」之名去蛇王咗半日，食飽飽之餘，仲忍唔住手買咗唔少周邊。

拍攝當日為平日・現場家庭客戶頗多

現場佈置極有心機，除咗可供打卡用嘅背景板，餐廳內部嘅桌子、窗戶、牆身、甚至連「小心地滑」個牌都換上左《太鼓之達人》系列嘅設計（聽講嗰個「小心地滑」係小小彩蛋黎，唔係好多人有機會見到，大家可以去留意下！），現場採半開放式設計，日間去仲有柔和天然日光比大家影相打卡，係拍拖或者朋友家人聚會嘅唔錯選擇。

每張枱上面嘅貼圖都唔同

主題餐廳除咗佈置要靚，當然都希望食物正正常常。今次搞 Crossover 嘅 Fullhouse Kitchen，本身主打輕食西餐以及港式小食，而今次配合「太鼓主題」，亦準備咗「二人餐」及「四人餐」嘅餐單，包括餐湯、主菜、甜點及特色飲料，餐單如下：

今次編輯部試食咗二人餐，無論賣相同埋味道都唔錯，飲品大大杯，甜品仲好有心思咁用糖膠造成「鼓面」，用餐時可以用隨餐附上嘅木錘仔，暴力爆破（！）阿咚同阿咔塊面，再將糖膠碎同底下嘅慕絲蛋糕混合進食……個過程幾治癒，大家貌必要試下。

糖膠口味比較甜，大家可以自行考量口味而選擇「敲落」幾多糖膠

左起：餐湯・茄汁肉丸意粉・帶子蛋包飯。另外托盤張紙超靚，兩隻公仔喺現場有得賣～

叫「太鼓」套餐仲會送限定 FIle 以及手機夾！

今次官方為咗「太鼓主題餐廳」仲特別準備咗好多款精美周邊產品，除咗公仔攬枕之外，仲有唔少實用產品，包括自動伸縮短傘、有塗層的保溫水樽、可以擺到手提電腦大小嘅布袋 Tote Bag 等等。

呢個太鼓主題餐廳已經在舉行當中，即日起去到 2021 年 8 月 31 日為止。餐廳採半自助形式，去到喺門口點餐，然後入去自己揀位坐。

餐廳地址如下：

【Fullhouse Kitchen 滿屋廚房】

地址：九龍橫頭磡聯合道 198 號樂富廣場 3203 – 3204 號鋪
電話：3615 0156
營業時間：
・星期一至五：上午 11:30 – 晚上 8:00（Last Order：7:45 pm)
・星期六、日及公眾假期：上午 11:30 – 晚上 9:00 (Last Order: 8:45 pm)

想進一步了解今次嘅主題餐廳，可以參考我地上一篇報導（按此）