一般香港人對「割草」嘅印象十之八九都係代表《無雙》系列，對真正修剪草坪應該都無乜概念。即將推出嘅休閒模擬遊戲《Lawn Mowing Simulator》就可以俾玩家體驗真正嘅「割草」，特別係近來好多人移民至英國，當係練習都唔錯丫！

《Lawn Mowing Simulator》由英國團隊 Skyhook Games 開發，係一款休閒模擬經營遊戲，可自由切換第一身或第三身視點。遊戲中玩家主要嘅工作就係幫各式各樣嘅人修剪草坪，開頭會喺英國鄉村小鎮幫人搞下後花園之類，之後會慢慢去到城市嘅住宅街道、廣闊嘅城堡地面，後期甚至有大型馬場玩。又因為本作得到 Toro、SCAG 同 STIGA 呢幾間真實世界割草車製造商授權，所以喺視覺同物理上都極之還原真實感。

除咗割草車還原度高，機件嘅設定同做法亦都跟足現實。喺工作前要先做地面檢查並設定刀片高度，仲要測量發動機負載。割草車又有條紋滾筒、覆蓋套件、集草袋、回收器、甩刀式底座等多種配件升級，加上遊戲中提供 12 部割草車，每部車有自己專屬升級、配件同任務，算係幾多野玩。

喺《Lawn Mowing Simulator》入面，自己親身落場剪草之外，仲可以建立自己嘅草坪護理公司。玩家需要購買及升級公司，騁請員工，之後仲可以選擇透過投放廣告弍拓展公司業務，當然亦要兼顧收支平衡做靚盤數。

《Lawn Mowing Simulator》預計於 8 月 11 日發售，對應平台為 PC Steam，支援繁體中文。