今次為大家介紹嘅遊戲《Pagan Age》，感覺上就好似《Age of Empires》嘅城市經營版本咁，唔需要同其他人 PvP，淨係專注於村莊發展同探索部份，睇落都幾好玩，鐘意呢類型遊戲嘅朋友要留意啦！

《Pagan Age》由 Glivi Games SA 製作，係一款村莊發展戰略遊戲。遊戲講述係以前地球並非由人類所主宰，曾經大地被黑暗所籠罩，霧氣瀰漫於森林及沼澤中，亦有怪物棲息於此。隨時日過去，人們似乎已經漸漸忘記怪物嘅存在，直到有一日發現新嘅土地，異教民族興奮地踏上呢片土地……。

去到新嘅土地，第一件事當然係要喺居住地起屋先，要起屋自然要先去森林砍伐樹木，喺呢款遊戲入面砍完嘅樹木需要人工搬運，因為島上有野生動物同怪物，所以需要額外投入額外人手保護資源。得到木材後，並唔係淨係用黎起屋，仲要設置護欄保護住區，令大部分野獸不敢接近遠離村莊，後期仲可以豎立圖騰，藉神靈嘅幫助推動村莊發展。

住屋搞掂之後，就要搞糧食。玩家前期可以去水邊釣魚，之後可以透過耕種獲得蔬菜同穀物，亦可以設立飼養區養育牲畜獲得肉類。當資源較穩定後，仲可以開墾土地獲得更多土地，亦可以興建大型風車幫助，玩法都幾豐富。

喺新土地安頓好之後就要準備出外探索，喺村中可興建訓練營，組織一班有戰鬥能力嘅村民，外出獵殺巨大嘅怪物。需然玩家可獵殺怪物，但係有啲怪物實在係太強大，面對呢個情況玩家可以選擇將村民獻祭，以此換取片刻嘅安全。基於遊戲名字「Pagan Age」（異教時代），遊戲中似乎可藉由敬拜各種神靈得到相應庇佑，宗教元素喺呢款遊戲中可以話係非常重要。

《Pagan Age》預計於 2022 年上市，對應平台為 PC Steam。