【遊戲新聞】NS 最強敵手現身 Valve 自家手提遊戲機「Steam Deck」發表

現時手提機市場可以話係 Nintendo Switch 嘅天下，不過黎緊就有機會打破一機獨大嘅現象，因為 Valve 正式宣佈推出自家手提遊戲機「Steam Deck」，坐擁超龐大遊戲庫加海量獨立遊戲，加上價錢親民，話佢係 NS 最強敵手絕不為過！

Valve 突然推出嘅全新手提遊戲機「Steam Deck」，承諾玩家可以隨時隨地使用整個 Steam 遊戲庫，遊戲數量絕對唔需要擔心，價錢方面亦都幾親民。根據官方資料，現時有三種型號可供選擇：配備 64GB eMMC 存儲，售價 $399 美元；配備 256GB NVMe SSD，售價 $529 美元；最後係配備 512GB 高速 NVMe SSD 存儲頂級型號，售價 $649 美元。雖然最平版本嘅 eMMC 存儲配置可能意味著更慢嘅遊戲安裝同讀取時間，但 Valve 承諾三種型號之間嘅遊戲中幀數以及圖形質量係無任何差異。

價錢親民，但如果淨睇硬件的話，同其他主機比較又如何呢？Steam Deck 配備四核 AMD APU / 八線程 Zen 2 CPU 及配備 8 個計算單元 AMD RDNA 2 GPU，以及 16GB LPDDR5 RAM，對比 Switch Nvidia Tegra X1 芯片組，Steam Deck 採用 AMD Zen 2 CPU 同下一代 RDNA 2 GPU 架構，硬件明顯優勝。加上 Steam Deck 有展示《Control》（NS 版只有雲端版）、《Jedi: Fallen Order》、《No Man’s Sky》呢幾款遊戲，證明有流暢遊玩 3A 大作嘅機能。

外型及機身設計方面，機身及屏幕尺寸就同新版 OLED Nintendo Switch 差唔多，亦都同樣配備 7″ 720p Touch Screen。控制器排位就有少少奇怪，十字制設於左冬菇左側而非下方，操控上會唔會不便就真係拎上手先知，另外喺屏幕兩側就有兩塊 Touch Pad，後方有四個額外按鈕，亦可以連接一個藍牙無線耳機。電池續航性方面，Switch OLED 續航時間為 4.5 到 9 小時，而 Steam Deck 為 2 到 8 小時，Valve 就話以《Portal 2》為例，可以 720P@60fps 運行 4 小時。重量則比 Switch 重得多，Switch 為 0.93 磅，而 Steam Deck 重量為 1.47 磅。

如果以 Steam Deck 對比最新世代主機 Xbox Series X 及 PlayStation 5，Steam Deck 就明顯比下去，首先係 CPU 無法同兩部新主機匹敵，而且 GPU 亦比不上 Xbox Series S，雖然同樣都係使用 RDNA 2 GPU 架構。根據官方主機數據，基本上係所有項目都係輸比新世代主機，但係如果同上一代主機比較，Steam Deck 1.6 TFlops 就巧妙地喺 Xbox One S（1.4 teraflops）同 PS4（1.8 teraflops）之間，不過都要注意返 Steam Deck 用咗更新嘅 RDNA 2 架構，因此喺規格上直接比較兩者其實都唔太恰當。

當然，作為一位遊戲玩家最關心嘅都係主機遊戲表現如何，上文已提過可以暢順地遊玩 3A 大作，相信主機能力不成問題，而 Steam Deck 仲另一優勢，雖然使用 SteamOS 3.0（Arch 架構）作業系統，但係本質上佢係一台 PC，技術上可以安裝 Windows 並將佢變為便攜式 Xbox Game Pass 專用器，仲有玩 PC 最歡樂嘅 MOD，亦可以插返落個 Dock 度喺電視上運行（Dock 要另購）。老實講，以呢個價錢買到一台打機專用 PC，真心都幾抵，話晒幾千蚊你淨買張 Display Card 都係啱啱夠。