【遊戲介紹】矚目新作瞬間達標《Crowsworn》吸收多款大作元素極具吸引力

經常都有獨立遊戲喺集資平台籌措製作資金，成功集資嘅遊戲不少，但如果只喺用極少時間就打爆，一定有其過人之處。獨立作品《Crowsworn》喺 Kickstater 只係用咗短短三個小時就達標，不但備受玩家們肯定，就連著名作品《星露谷物語》製作人 Eric Barone 都有關注，再睇埋條片，完全係「掂」阿！

《Crowsworn》由加拿大獨立團隊 Mongoose Rodeo 製作，係一款橫向動作類銀河戰士惡魔城遊戲。遊戲舞台為於一個叫做「Fearanndal」嘅地方，玩家所扮演嘅主角由棺材醒來後，發現自己失去記憶而且身處一個陌生嘅地方，去到附近嘅村落後，由村民口中得知世界已被黑暗之神詛咒，世人要為祖先嘅罪孽永遠懺悔，為咗解開詛咒以及尋找回復記憶嘅方法而踏上旅途。

作為一款橫向動作遊戲，最重要嘅當然係戰鬥系統吸引，《Crowsworn》嘅戰鬥系統就啟發自《The Hollow Knight》、《血源詛咒》同《Devil May Cry》，都係主打快節奏多風格戰鬥。玩家將會有鐮刀、手槍同黑魔法三種武器，一般狀態下鐮刀係近戰武器、手槍係遠距武器（無限上彈但有彈數限制）、黑魔法就介乎於兩者之間並且有強大傷害，簡單如發射能量子彈，使用爆炸進行遠程攻擊；或者召喚暗影之手來捉住並攻擊敵人。

上面講到嘅只係「一般狀態」，類似《Devil May Cry》，各種武器魔法係可以互相配合並改變戰鬥風格，例如將鐮刀掉出去再用槍射佢，咁就可以一直將把鐮刀向前推並將傷害轉化為更大嘅近戰鐮刀傷害，又或者將自身高速旋轉向前滾動（即係超音鼠咁）。加上遊戲中有符文強化系統，好似係加電屬性落武器改變性能，再對應其他武器嘅改造產生更多嘅戰鬥方式，老實講係幾爽下。

The many deaths of Deryll… ⚔️🔫🐦

🦃Wishlist: //t.co/XNITcApLmg
🦆Kickstarter: //t.co/aAGkqG2AbY #screenshotsaturday #gamedev #metroidvania pic.twitter.com/0u7JkySHOR

— Mongoose Rodeo (@MongooseRodeo) May 29, 2021