二戰時期德國曾進行種族優生政策，戰敗後因政策而產生極多孤兒，而呢班孤兒因為身世問題自然被人嫌棄。俗語有云「唔關事嘅小朋友係無辜的」，面對呢班孤兒，你會唔會伸出援助之手？你又會肯為呢個決定犧牲幾多？喺《My Child: Lebensborn》入面將會感受到一個非常哀傷、辛酸而又真實嘅故事，遊戲得到多個獎項，喺 Steam 上亦有「極度好評」評價，絕對係品質證明。

《My Child: Lebensborn》由 Sarepta studio 及  Teknopilot 製作，係一款育成遊戲。因為遊戲係基於真實事件改編，所以要講返少少歷史。喺二戰時期德國曾進行種族優生政策，當時希特拉認為只有金髮碧眼白皮膚嘅「雅利安人」先係世上最優秀嘅種族，為咗「淨化社會」於是就實行「生命之泉」（亦即係遊戲名稱 Lebensborn），開頭只係國內搵金髮碧眼女人逼佢哋同軍人生仔，後來就發展到國外佔領區，例如波蘭、挪威、捷克等東歐國家重複上述嘅動作，並尋找符合「雅利安」特徵嘅幼童，再強行將佢哋帶返德國賦予新身份，此舉令大量幼童喺戰敗後變成孤兒。

遊戲舞台發生喺挪威，當年德國戰敗並撤出後，留低大量嘅「雅利安嬰兒」，曾被佔領嘅挪威政府及人民自然視呢啲嬰兒為復仇對象，多數被視為雜種餘孽，受盡其他人嘅侮辱，只有少數幸運兒被送返德國父親家中，玩家所扮演嘅角色就係一為好心嘅挪威人，收留咗一位「雅利安孤兒」，故事由此開始。

一開始玩家可以領養卡琳或者克勞斯，由於角色本身經濟條件唔係幾好，除咗打工之外有時仲要加班搵多啲錢，同時要兼顧煮飯並盡可能給予小孩教育及愛護，當中充滿日常生活所見嘅矛盾。前期係幼兒期，只要顧到食飯、清潔、講故事，滿足飽食度、清潔度、愉悅度就搞掂，雖然屋企窮到爆，但係生活尚算美好，屋企嘅氣氛亦都好和諧溫馨。

當小孩開始返學，遊戲先係正式開始。學校基本上係社會嘅縮影，由於身份嘅關係，你嘅小孩喺學校受到辱罵、排擠、被打，而你無處控訴亦都無力反抗，只能夠慢慢開導。遊戲中每一日都有固定時間單位，你要分配時間同資源，例如加班可以搵多啲錢買更好嘅食物，但係換黎嘅日頭喺學校被欺淩，餓住等你返黎嘅小孩，又可能係因為要縫衣服而無時間講睡前故事。類似嘅情況日復一日，不但無力更令人感受到悲哀。

除咗日常生活，喺小孩情緒低落時要花時間陪佢玩，參加活動令佢地有有勇氣同其他人互動，喺節日為小孩送上禮物，亦要抽時間寫信去幫小孩搵到真正嘅親人，盡一切努力令佢唔會因為喺敵意同仇恨長大而失去溫暖和幸福。

《My Child: Lebensborn》雖然以遊戲黎講缺點不少，例如選項少、每日可做嘅事唔多，但係遊戲所帶出嘅訊息非常有意義，極之值得一玩。遊戲已經於 6 月 1 日推出，對應平台為 PS4、Xbox One、Nintendo Switch、PC Steam、iOS 及 Android，對應繁體中文。