平時睇開各大討論區嘅朋友相信都睇過一幅哈利波特揸槍圖（別名：榮恩這東西比魔杖好用），開頭其實只係鳩噏但係慢慢發展成 Memes，你又點估會有痴線佬將呢個概念整做遊戲。早前公佈嘅遊戲《Wizard with a Gun》，玩家將扮演一位使用魔法槍械嘅巫師，與朋友一齊冒險。

《Wizard with a Gun》由 Galvanic Games 製作，係一款 Roguelike 動作冒險遊戲，採用第三身視點，支援最大四人合作。遊戲中玩家將扮演一位發現槍械比魔法好用嘅巫師，喺隨機生成嘅沙漠、沼澤、草原等地方冒險，並收集各樣物品製作魔法子彈擊敗各種敵人。

遊戲中使用魔法製成嘅子彈，當中包括增加爆炸範圍、改變彈道、增加持續時間等能力，亦可以配合本身嘅法術令戰鬥更多元化。除咗武器，角色嘅長袍、帽子、盔甲同裝飾品都可以自由設定，亦可以係工房中製作，當然仲可以研發新嘅魔法同改槍啦。

根據之前外媒 PC Gamer 嘅訪問，呢隻遊戲最初嘅設計概念真係來自甘道夫揸住支 AK-47 幅圖（雖然我覺得甘道夫係點力體嘅近戰巫師），慢慢再發展到係西部荒野嘅遊戲背景，再加入會用槍嘅牛仔巫師概念，到最後再變成多人合作嘅冒險遊戲，整個概念非常有趣味性。

《Wizard with a Gun》預計於 2022 年推出，對應平台為 Nintendo Switch 及 PC Steam。