講到多人海上求生遊戲近年最出色非《Sea of Thieves》莫屬，黎緊有一款新遊戲《Trash Sailors》就有如手繪簡化版嘅《Sea of Thieves》，同樣要多人合作，同樣要負責船上一切事項忙到嘔，現時有試玩版提供免費下載，我哋試過發現都幾得意下。

《Trash Sailors》由 fluckyMachine 開發，係一款休閒冒險合作遊戲，最大支援四人同遊，採用手繪美術風格。遊戲基本玩法係乘坐木筏漂流，喺海上回收各種垃圾打碎成原料，然後可以用黎做燃料或者修補木筏，途中擊退各種來襲嘅生物及巨大 Boss，逐步向終點進發。

木筏喺海上航行所有嘅工作都要有玩家操作，除咗上面講嘅收集海上垃圾資源、擊退各種敵人、修補木筏之外，掌舵閃開冰山、樹木同其他船隻，有時仲會有海嘯打上木筏，唔避開的話就會被衝落海，仲有黎自天空嘅敵人會夾走你。執夠資源時又要起炮台，同時又要兼顧燃料補給，可以話係忙到嘔。

《Trash Sailors》會於近期出，不過實際日期未定，對應平台為 Xbox One、PS4、Nintendo Switch 及 PC Steam，現時 Steam 上有體驗版供免費下載。