今年年頭出咗一隻有趣嘅小品遊戲《Encodya》，啟發自吉卜力工作室嘅甜蜜及創造力，又有類似電影《Blade Runner》嘅故事背景及氛圍，仲有遊戲《Monkey Island》中嘅幽默感及遊戲風格，溝埋就變成呢款特別嘅遊戲。

《Encodya》由獨立工作室 Chaosmonger Studio 開發，係一款點擊冒險遊戲。遊戲背景設定於 2062 年未來一個叫做「Neo Berlin」嘅地方，多數人沉迷於虛擬世界，已經無法分別現實於網路世界，社會亦由企業所控制，施行高壓管治同時亦非常腐敗。一日，女主角 Tina 意外發現失蹤父親所留低嘅使命，就係要拯救世界翻獨裁邪惡政權，當 Tina 與唯一嘅朋友兼守護者機械人SAM-53 踏上使命之旅時，就發現警察開始追殺佢地……。

遊戲主要玩法同一般點擊解密遊戲差唔多，都係搜索城市嘅四周以及同 NPC 進行互動，從中尋找有關解謎題嘅道具同線索。喺探索過程中亦都可以隨時切換操作 Tina 或者 Sam，兩者分別有各自與運動能力，而且唔同角色與 NPC 互動亦會得到不同嘅回應。至於操作方法就非常簡單，都單擊滑鼠左鍵行路、雙擊跑步。

遊戲場景美術用色係比較冷調，但係角色上嘅設計靈感就源自宮崎駿動畫，所以感覺上好有親切感，對比起社會上嘅冷漠形色極大嘅反差（遊戲入面仲會重現有宮崎駿動畫中嘅名場面，好過癮）。有趣嘅係遊戲中有香港著名餐廳「天香樓」、社會高壓管治、公權力過大、主角 Tina 身上著住一件寫住「獨」字嘅 Tee，真係唔知影射緊啲咩。

《Encodya》已經推出，對應平台為 PC Steam，現時做緊特價 HKD $49.5，勁抵玩。