早前編輯部有幸提早參與媒體網上試玩《破曉傳奇（Tales of Arise）》嘅體驗版本。《破曉傳奇（Tales of Arise）》定於 2021 年 9 月 10 日正式推出，作為《Tales Of》系列 25 周年紀念作品，相信唔少 Fans 都同我一樣，早於遊戲開初公佈之時，已經感到萬分期待。

遊戲早前公佈嘅畫面以及動作場景，似乎都與以前嘅同系列作品分別顯著，因此身邊唔少網友都表示，擔心遊戲系統會否「跟隨潮流」而變成一隻單純嘅動作遊戲？又或者會出現「截圖靚，但出到黎畫面唔得」等等狀況？試玩體驗版本之後，我對於遊戲正式版本絕對係期待值大增。

是次嘅《破曉傳奇》無論係畫面、人設等等都表現細膩，角色性格鮮明而各具特色。是次遊戲採半開放世界式設定，原野版圖頗廣，角色之間亦會出現各種即時對話，接近魔物就會進入戰鬥，以上皆為傳統嘅 RPG 設定；地圖上亦會有隱藏嘅 Boss、各種暗道、寶箱等等元素有待玩家發掘。

戰鬥部份保留《Tales of》系列固有特色，例如玩家可以轉換操控角色、亦可以事前選定其他參戰角色嘅戰場方針｜戰鬥技能；相比個人表現，今集亦相當重視角色連攜技，能夠對敵人造成加倍破防傷害，而戰鬥畫面亦非常華麗，對於慣於打怪練等嘅玩家黎講，就算長期進行戰鬥應該都未會感到疲悶。

預先設定戰技

根據試玩版中嘅體驗，《破曉傳奇》嘅戰鬥有一定難度，敵人亦有唔同屬性或者弱點。幾位隊伍角色當中，女主角嘅職能定位為遠攻及補血、男主角為近攻輸出、另外亦有擔任坦、法術系、以及武鬥型嘅角色；玩家要如何善用角色技能，都係技巧之一。

戰鬥畫面華麗順暢

連攜技於戰鬥中非常重要

當然，距離正式版推出尚有數月，遊戲應當仲會有部份調整；不過，玩完試玩版後，我相信《Tales Of Arise》絕對會係一隻 2021 年值得期待嘅 RPG 作品，Fans 們絕對可以放心入手。

《破曉傳奇（Tales of Arise）》定於 2021 年 9 月 10 日正式推出，定應平台為 Xbox One｜Series X｜S、PS4｜5 及 PC  Steam。有新消息會再為大家報導。下為遊戲 2021 年 Summer Game Fest 公開嘅宣傳片段：