新世代主機正式發售後，因為大家都無乜 Game，所以就算兩個陣營都無機賣，戰況未算激烈（都係 Fans 們過招），不過因為 E3 2021，戰情有所改變。微軟因為展上表現出色，不但進一步令主機炒價上升（反正兩大主機都無貨），近日本港就連微軟主力數位產品「Xbox Game Pass」都無貨，真係無諗過會連 Code 都無得賣…….。

事源係早幾日 Xbox Series X 突然返咗少量貨，雖然瞬間就被搶晒，但係 HKT 旗下網上購物平台竟然傳出有貨，於是就引起大量用家 / 非用家去搶購，點知去到最後一步係無結帳選項。因為要食骨嘅關係，跟機一定要買多張三個月 Xbox Game Pass Ultimate 代碼，但係呢個 Item 就無晒貨，就算你好彩撳到入去到都無法埋單。老實講，微軟嘅數位產品可以賣到無貨，呢個情況真係非常少見，足見 E3 效力驚人。

E3 除咗帶動銷售，網上嘅討論亦都偏向微軟一方。根據外媒 Wccftech 報導，透過社交媒體情報分析公司 Synthesio 得到嘅數據，Xbox Bethesda 喺社交媒題被提及次數係全 E3 之冠（約 110 萬），遠遠領先次位嘅任天堂，而 Ubisoft 嘅討論亦比起 Devolver 同 Square Enix 來得多。

圖片來源：Wccftech

不過最令人驚訝嘅係一眾被提及嘅遊戲數據，雖然有《Starfield》、《薩爾達傳說 曠野之息 2》等大作，但係社交媒體提及嘅首位遊戲係《Among Us》，其次係《Stranger of Paradise Final Fantasy Origin》，第三位係《Battlefield 2042》，其他遊戲數據可以去返 Wccftech 相關報導查看。

圖片來源：Wccftech

最後，想講一講微軟雖然擁有多達 23 間嘅自家工作室，但係並非全靠自家工作室。今次 E3 發布會遊戲陣容入面有 21 款作品係由第三方廠商製作，由大作到獨立遊戲都有（例如《瘟疫傳說 2》），而且種類相當平均，遊戲亦都好吸引，再加上首日登上 XGP 呢個賣點，的確係殺傷力十足，Sony 絕對要正視呢個情況，始終有競爭下先會有進步，對機迷黎講點都係好事。