主打輕鬆悠閒嘅《動物森友會》同傳統 MMORPG 要打打殺殺升 LV 兩者好似無乜關係，但如果將佢哋溝埋的話好似又幾得意。黎緊就會有一款新嘅 MMO《Palia》，佢唔係要你 Keep 住農怪升 LV 打裝，反而係要大家經營農場，享受與朋友間嘅生活，好適合洗滌我哋嗜血嘅心靈。

《Palia》由 Singularity 6 開發， 係一款大型多人社區模擬農場經營遊戲，採用第三身視點，開放世界。遊戲入面人類喺幾千年前已經消失，突然有一日人類又開始出現於世界各地，作為新出現嘅人類之一，玩家需要喺呢個世界為自己建立新家，享受耕田釣魚捉蟲烹飪嘅樂趣，又或者同三五知己拎起武器去打獵。

除咗以上要素，玩家同樣可以為家中添置各種家具同佈置，就好似《動森》一樣，都係要自己收集物品製作。另外根據官方介紹，遊戲中可以同 NPC 談戀愛，而且仲會持續為遊戲更新，喺推出遊戲未來幾年都會有一個深刻且不斷發展嘅故事，由於係大型社區遊戲，預期會出現籌備祭典、大型狩獵等大型合作活動，玩家可分工進行食材收集、煮食、建築攤檔等工作。

《Palia》遊戲暫時未有實際推出時間，預計會喺短期內展開 PC 版 pre-Alpha 封閉測試，只要前往官網申請就得。