又有一款 Cyberpunk 風格嘅遊戲面世，今次美術仲有少少當年《攻殼機動隊》味道。《Loopmancer》（生死輪迴）除咗美術有 Feel，遊玩部份表現亦都非常唔錯（最令人驚喜嘅係有原創成份），日前正式公佈首條宣傳片段，似模似樣。

《Loopmancer》由玻璃大國團隊 eBrain 製作，係一款 Roguelike 橫向動作遊戲，採用 Unreal Engine 4 製作。遊戲設定於 2046 年未來一座叫做「龍城」嘅東方城市，主角係一名私家偵探，喺調查女記者失蹤事件時不幸喪命。然而死咗之後唔知點解會喺自己屋企床上醒返，並再次接到調查女記者事件委託電話，發現自己已經進入死亡循環。為咗破解輪迴，玩家要喺每次循環中變得更強，先可以走得更遠。

同《Dead Cell》等 Roguelike 遊戲相同，玩家都係要透過多次死亡循環強化自己，喺影片中見到戰鬥方式有近戰刀劈、遠距離槍械射擊，另外有反擊技，打擊感不俗。遊戲中有多達 100 種以上武器供解鎖，另外可透過強化、變換義肢晶片強化或改變戰鬥技能。敵人類型就有 30 種以上，關卡就有七個，而且因為係 Roguelike 類型，每次關卡都會有所改變。另外仲有多重結局設計，因應玩家喺關卡中嘅選擇會影響之後劇情嘅走向。

《Loopmancer》（生死輪迴）未有確實推出日期，對應平台為 PC Steam，亦有計劃會於 PS4、Xbox 及 Nintendo Switch  等家用機平台推出。