E3 2021 由外媒 Gamespot 所舉辦嘅 Play For All Showcase 中，發表咗一款由台灣團隊製作嘅遊戲《沉沒意志》（Minds Beneath Us），充滿台式味道嘅未來科幻世界令人眼前一亮。雖然有預告片發表，但係關於遊戲嘅資訊未算係好多，睇住片先啦。

《沉沒意志》由台灣獨立遊戲團隊熊骨工作室製作，係一款電影式角色扮演冒險遊戲。遊戲講述未來台灣 AI 已經全面普及，令到無數人失業。呢個時候出現一個新嘅產業，就係用人腦連上運算網絡以取代價格高昂嘅 AI 硬體，失業人士走投無路下唯有投身呢個行業。以呢個病態社會為舞台，一樁陰謀逐漸顯現……

遊戲採用電影式敘事手法，，對話中會有選擇分支，因應選擇會改變角色間關係甚至改變結局，另外亦有若干動作要素。根據製作團隊訪問內容，遊戲設計背景更偏向亞洲人觀點，遊戲入面所描寫嘅政府企業雖然冷血，但係提供到溫飽，至於玩家覺得是對是錯就由大家自行判斷了。

《沉沒意志》暫時未有確實推出時間，對應平台暫時為 PC Steam，其他版本要等資金足夠後先會考慮，有興趣嘅玩家可以先將遊戲加入 Wishlist。