由《幻想水滸傳》開發班底另起爐灶創立嘅 Rabbit & Bear Studios 於「Xbox and Bethesda Showcase」節目當中，正式公佈有「幻想水滸傳精神續作」之稱嘅《百英雄傳（Eiyuden Chronicle: Hundred Heroes）》將於 2023 年上市。

同時公佈故事前傳《百英雄傳：崛起（Eiyuden Chronicle: Rising）》將於 2022 年上市。兩者對應平台為 Xbox One｜Series X｜S、PS4｜5 及 PC（Steam＆Epic Store），於推出首日會登錄 Xbox Game Pass。

《百英雄傳》由村山吉隆、河野純子、小牟田修、村上純一等人合作開發。《幻想水滸傳》「親生老竇」村山負責劇本故事、河野負責人物設計、小牟田負責程式系統設計、以及村上負責美術指導與製作人，四位皆為《幻想水滸傳》年代活躍嘅遊戲業界人士，相信今次嘅作品有一定嘅信心保證。

《百英雄傳》原先為一個 Kickstarter 項目，推出後受到玩家大力支持，短短三小時之間已經成功募得理想款項，更成為 2020 年 Kickstarter 遊戲類別中最成功嘅集資項目。工作室希望是次將於 2022 年率先推出嘅《百英雄傳：崛起（Eiyuden Chronicle: Rising）》嘅「前傳」，可以令玩家先行體驗及理解《百英雄傳》嘅宏大世界觀。

目前兩隻作品正式推出日期未定，有最新消息會再為大家報導。