E3 2021 Future Gaming Show 入面，公開一款幾有趣嘅生存遊戲《Project Ferocious》。玩家將置身於史前嘅巨大島嶼，島上有各種巨大恐龍，玩家除咗要想辦法求生之外，仲要拎住部相機周圍影相，唔再係一味殺殺殺。

遊戲配置新式相機

《Project Ferocious》由獨立團對 OMYOG 開發，係一款潛行生存射擊遊戲，採用第一身視點。遊戲講述太平洋某個地方有水手不斷失蹤，仲有海怪出現嘅傳說，為呢個地方蒙上一片神秘迷霧。突然間你收到一個由失踪調查記者發出嘅求救訊號，將你吸引到附近，竟然發現一個唔應該存在嘅島嶼。上島後不但發現呢個島嶼有巨大嘅史前生物，仲有不惜一切要將呢個島嶼隱藏嘅敵人，玩家就要喺呢個地方邊努力求生邊搵朋友同影相留低證據公諸於世。

遊戲中玩家除咗有相機跟身之外，仲有各種槍械武器及工具協助生存。利用繩索垂降陡峭懸崖、探索水中洞穴，等等。遊戲中有大量地方可供探索，亦有陸地及水上用嘅載具，而且島上嘅環境係可以破壞的，可能有得挖洞整陷阱都唔奇，一切留待日後公布。

《Project Ferocious》預計於 2023 年上市，對應平台暫定只有 PC Steam。