ALTUS 於 2021 年 6 月 16 日舉行嘅「Nintendo Direct | E3 2021」裡面宣佈，旗下經典遊戲系列新作《真・女神轉生 V》已定於 2021 年 11 月 11 日正式推出，為一隻 Nintendo Switch 平台限定作品，普通版｜數位版定價 HKD 468（9,878 円（連稅））；限定版定價 HKD 788（16,280 円（連稅））。

《真・女神轉生 V》於 2017 年首次發表，為 ALTUS《真・女神轉生》系列嘅最新作品，由公佈去到今年正式推出相距四年時光，絕對係 Fans 望穿秋水之作。

《真・女神轉生 V》以 Unreal Engine 4 開發，以現代東京作為舞台，玩家飾演一名高中生，某日上學途中，驚遇惡魔之門打開，大量魔物於東京湧現，令東京成為廢墟。玩家被傳送到形同沙漠嘅荒野，遇到名為「ダアト」嘅惡魔，兩人結下契約，開始今集嘅故事。

《真・女神轉生 V》與系列其他作品一樣，都有收納使魔、召喚使魔、合成使魔嘅固有選項，同時遊戲裡面亦會有唔同分歧選擇，從而影響劇情發展，因此故事有多重結局。今集故事裡面登場嘅惡魔種類多逾 200 種，繼續係由土居政之先生設計繪製。

《真・女神轉生 V》於 2021 年 11 月 11 日正式推出，對應平台為 Switch。