E3 PC Gaming Show 入面，公開一款超巨大機械人 x 怪物 x 超人大亂鬥《GIGABASH 巨擊大亂鬥》，感覺就好似電影《Pacific Rim》（環太平洋）喺城市決戰咁，玩法就似細個果隻《King of the Monsters》咁，睇落非常過癮！

《GIGABASH 巨擊大亂鬥》由馬來西亞團隊 Passion Republic Games 製作，係一款大亂鬥式動作遊戲，支援多人對戰。遊戲講述一股神秘力量喺毫無預警下喚醒咗喺世界各地沉睡嘅怪獸，同時喚醒人類基因中最古老嘅恐懼，世界毀滅再次進入倒數階段。

遊戲中玩家可選擇各種巨型怪物、英雄或者巨大機械人喺各式場景中展開最多四人對戰。戰鬥中大家可以拆城市大樓落黎投擲敵人，場景亦會有特殊變化，例如熔岩流出，企上去就會扣血。另外戰鬥中儲夠「Giga Point」就可以變身巨大化，機械人仲識合體添，好正！

《GIGABASH 巨擊大亂鬥》遊戲預定於今年推出，對應平台為 PS4 及 PC 平台。