正常城市建設類遊戲如《Sim City》、《Civilization》都係將地圖變得更適合人類居住，更多方便嘅設施、交通，早排發表嘅遊戲《Terra Nil》就掉返轉，玩嘅係將地圖綠化重現大自然光景，完全係「逆向城市建設」玩法，教育意義一流！

《Terra Nil》由曾製作《Broforce》嘅獨立遊戲開發團隊 Free Lives 開發，係一款休閒城市建設遊戲。遊戲中玩家將肩負復甦全球環境嘅任務，有數個環境需要由玩家「恢復」，當中包含培育生態多樣性、修補氣候變遷等等，復育整個星球，重建各區域特有嘅動植物群。

遊戲基本玩法就係將如同荒野嘅垂死土地，復原為綠意盎然嘅肥沃土地，依靠嘅係有「自然力量」嘅各類建築物，每次放資呢類建築物就會出現相應嘅綠色土地，然後就會得到新嘅自然力量作為報酬，進一步建設。同一般城市建設類遊戲一樣，要平衡收支，唔係狂起野就得，而且自然力量資源係會枯竭的，因此需要有計劃地安裝設備，有時亦要拆除前人所留低嘅垃圾裝備。

綠化過程都要有正確嘅程序，由水源開始，先淨化水源再令到土壤恢復，下一步先係係進行種植、引入野生動物、強化生物多樣性，最後就回收返所有建設，將環境變返原始狀態，令一切回歸大自然。喺預告片入面嘅大自然顏色用咗柔和嘅色彩表達，而製作團隊亦都表明受到受吉卜力工作室作品影響，的確遊戲中嘅藝術風格係有幾分吉卜力味道。

《Terra Nil》暫時未有推出日期，不過喺 6 月 17 日起喺「Steam 新品節」入面就有得搶先試玩，想試下做環保鬥士嘅玩家留意啦。另外呢款遊戲嘅原型版本《Terra Nil》喺 itch.io 上面有得免費下載。