近年超重動畫感嘅遊戲首推一定係《二之國》，如果鍾意呢種風格遊戲嘅朋友就要留意啦，日前倫敦獨立工作室 Shedworks 透過外媒 IGN 發表佢哋製作中嘅作品《Sable》實機片段，畫面線條雖然無《二之國》咁細膩，但係仍然有非常重嘅動畫感，值得留意。

《Sable》係一款解謎冒險遊戲，採用第三身視點，開放世界。遊戲中玩家扮演女孩 Sable，喺一個被沙漠覆蓋嘅未知星球中探索。透過搜索廢墟、古代紀念碑、墜毀太空船殘骸等地方了解星球並與荒漠中其他流浪者相遇，同時揭開失落已久嘅謎團。

今次實機影片主要係展示一個似係初期階段場景，過咗基本操作教學之後就入到營地同當地居民互動，對話中有回覆選項，根據之前嘅資訊，遊戲會因應角色回覆而產生一定程度嘅改變。傾完計之後就騎喺一部類似電單車嘅機械，最後進入廢墟並獲得特殊力量，暫時未有戰鬥相關資料。

另外遊戲創意總監 Gregorios Kythreotis 係 Twitter 上面講到《Sable》刻意將遊戲降為 30fps，而且仲搵緊方法將遊戲降至 24fps，即使遊戲本身係用緊 120fps 運行。佢想咁做嘅原因，係希望透過抑制幀率，實現整體更接近動畫表現，因為一般動畫多數都係用 24fps 製作的。

//twitter.com/ShedworksGreg/status/1401965792057569281

《Sable》預定於 2021 年上市，對應平台為 Xbox Series X|S、Xbox One、PC Steaam，支援日文字幕及介面。