巴西獨立遊戲工作室 1M Bits Horde 公佈全新經營系列遊戲《Spirit Of The Island》，對應 PC Steam 平台，預計 2021 年第四季會展開早期販售。

《Spirit Of The Island》為一隻以南國小島作為舞台經營遊戲，當中亦帶有 RPG 元素。遊戲可單人遊玩，亦支援二人線上合力。玩家身處嘅小島非常荒蕪，為左改善當地經濟，必須振興當地旅遊業，賺旅客錢，並利用資金不斷改善小島上面嘅建設，係一隻非常耐玩嘅經營遊戲。

改善經濟嘅第一點係要自給自足，因此玩家首要任務係要建築牧場、振興農業，為小島提供生活資源；除此之外，亦要建築商店街、觀光點、海邊渡假村等等設施，同時亦要舉辦旅行團去吸納觀光客，賺取旅遊費用。

除左建設之外，玩家亦都需要準備裝備及武器，因為你需要到島上到處探險，尋找各類可以發展成景點嘅文明、以及對抗海盜嘅入侵。除咗海盜，探險期間會遇上各種敵人，包括野獸、古代生物等等。武器種類包括劍、斧頭等等近攻型裝備。

於島上探索時仲可以收集資訊，令玩家可以更了解小島嘅歷史、文明以及秘密，故事後期更會揭露玩家角色腦海裡一直深藏嘅一段記憶。

《Spirit Of The Island》預計於 2021 年第四季度開始早期販售，早期販售期間遊戲暫時只支援單人模式；日後工作室會再加入新嘅任務、地圖、道具、甚至會加入線上 Match Play 模式等等，係一隻非常有野心嘅作品。對應平台為 PC Steam。