《Pokémon》（精靈寶可夢）系列陪伴大家成長，每次講起入面啲小精靈都係「Pika Pika」咁，就算動畫版都係以兒童向為主，就算打敗敵人、收服等過程都唔會有血腥暴力嘅表現，有無諗過如果將佢哋寫實化會點？曾經推出痴線 Game《Craftopia》果班人日前正式公佈新作《Palworld》，就係將《Pokémon》寫實化嘅一隻遊戲，淨係概念都已經正爆！

《Palworld》由日本獨立團隊 Pocket Pair 開發，係一款多人連線動作角色扮演遊戲，採用第三身視點，開放世界。根據官方極其簡單嘅介紹，呢隻遊戲係與不可思議嘅生物「帕爾」（寶可夢）一齊過住悠遊自在嘅生活，並投身於與盜獵者們相互搏鬥之中……等等。不過《Craftopia》先例，隻 Game 又點會咁簡單。

帕爾有多種物種，各自有特殊能力，放電、放火、冷凍、飛行等能力大家都好熟悉架啦，分別係佢哋嘅「用途」，例如想釣魚只要將隻發電帕爾綁起再成隻掉落水就得。喺《Palworld》入面，帕爾除咗戰鬥之外仲要從事建築、農業、發電又或者喺工廠做苦工，因為只要提供飼料帕爾就會不斷工作，直到生命耗盡。

戰鬥方面，呢隻遊戲嘅訓練員係可以裝備槍械的（有突擊步槍、霰彈槍、狙擊槍、火箭炮等），所以自己有強大嘅戰鬥力，帕爾反而比較似係輔助性質，而且仲可以拎佢哋黎做盾牌擋子彈（真係物理上嘅盾牌）。玩家要面對嘅敵人係非法盜獵者，有趣嘅係自己都可以成為盜獵者，之後仲可以獵殺帕爾做食物，好鬼抵死。

遊戲採用開放世界，所以可供探索嘅元素都唔會少得去邊，基本上海陸空只要係見到嘅地方就可以探索。要喺廣大嘅地圖移動自然要有坐騎，只要騎上不同種類嘅帕爾就可以飛行、游水、挖地。另外遊戲亦有繁殖及遺傳系統，帕爾喺繁殖時會繼承親代嘅特性，利用呢點將佢哋瘋狂交配就有機會創造出最強嘅帕爾。

《Palworld》預計於 2022 年上市，對應平台為 PC Steam，有興趣嘅朋友可以先將遊戲加入 Wishlist。

相關回帶文章：

【遊戲介紹】「抄」之極致 《Craftopia》將所有大作融合一身