城市建造系模擬遊戲年中我哋都介紹唔少，話晒呢類遊戲真係百花齊放，各有各好玩。不過近年呢類遊戲加入「人食人」呢類黑暗元素，繼之前介紹過嘅《Frost Punk》，又有一款《Going Medieval》做緊搶先體驗，唔只有人食人，其他玩法都好有趣，並且得到玩家「極度好評」評價，幾抵玩！

《Going Medieval》由獨立團隊 Foxy Voxel 製作，係一款中世紀沙盒城市建造系模擬遊戲，採用開放世界。遊戲背景設定於十四世紀末，一場大型嘅瘟疫爆發導致全球 95% 人口死亡。玩家將扮演一名領主，帶領倖存嘅人民喺大自然中開墾土地建立新家園，並且保護佢哋免受野外動物及其他倖存者勢力襲擊。

玩得呢類遊戲，城市建造系統自然係最重要嘅一環。喺呢隻遊戲入面，初頭係由簡陋嘅小木屋起手，解決人民住屋問題之後就要搞糧食。同其他遊戲類似，都係要開墾農地、飼養家畜，仲要儲備糧食過冬。有趣嘅係人民性格行為不盡相同，部份人民會有食人肉嘅特性，由於會有敵人來襲，殺敵之後自然會有屍體留低，然後就……。

搵食之外，令人民溫暖（著冬天衫）、研發、製作武器及裝備都係必需的，要製作自然需要材料，一般黎講都係伐木挖礦。不過喺呢隻遊戲入面，天然資源係會用完的，樹木會斬晒，礦會挖晒，要令呢啲資源再生就要種樹，無晒礦可以回收敵人嘅武器再將之熔返做鐵，整個設定都合乎邏輯，好正！

《Going Medieval》目前正進行搶先體驗，對應平台為 PC Steam。暫時遊戲內容未夠豐富，部份內容見到藍圖但未實裝（例如見到其他地區但未有得過去殺人搶野），好在製作團隊話會持續強化遊戲系統並會因應玩家回饋添加及修正內容，有興趣嘅朋友可以一試。