《Metal Slug》（越南大戰）作為橫向射擊遊戲代表作，應該都無乜異議，遊戲爽快過癮亦都啟發其他人製作相類似遊戲。幾日前就有一款類似嘅橫向射擊遊戲《暴走大鵝》（Mighty Goose）推出，加入自己嘅元素令遊戲性不減反增，短短幾日就得到「極度好評」評價，成績優異。

《暴走大鵝》由 Blastmode、MP2 Games 共同開發，係一款橫向射擊遊戲，支援雙人同遊。遊戲中玩家將扮演獎金獵「鵝」，擊敗宇宙統治者空虛王同佢無數嘅手下以及槍械怪，簡單講就係見怪就殺。

遊戲基本玩法同《Metal Slug》大同小異，主要操作都係主射擊、特殊武器、跳躍，另外加入有一段無敵時間嘅翻滾動作以及超必狀態，而近戰攻擊取消並改為扣減生命值，唔再係一下死。因為有翻滾動作同扣血制，難度比起《Metal Slug》下降唔少，就算係動作遊戲苦手都幾易入口。

同《Metal Slug》類似，遊戲中有機關槍、散彈槍、飛彈發射器、雷射槍等武器，同樣要扣彈數。喺部份關卡更會有坦克、動力裝甲等載具使用。遊戲過程中亦會發現被困嘅豬仔，救佢出黎就會跟住你行幫手殺怪。至於敵人方面，數量同種類都幾多，頭目設計亦明顯有花心機落去，攻擊模式並非同一套路，老實講真係幾唔錯。

《暴走大鵝》已經推出，對應平台為 PS5、PS4、Xbox Series X|S、Xbox One、Nintendo Switch 及 PC Steam，Steam 版本支援線上聯機合作，家用機版本只能單機同遊，支援繁體中文。