自從獨立遊戲《Mortal Shell》（詳細評測文章）取得成功後，令一眾玩家對獨立創作遊戲信心大增。黎緊又有一款齋睇片都感覺到高質嘅類魂系遊戲《Bleak Faith: Forsaken》，日前放咗條最新影片出黎，展示一小段與頭目戰鬥片段，睇完令人充滿期待！

《Bleak Faith: Forsaken》由獨立工作室 Archangel Studios 開發，係一款類魂系動作角色扮演遊戲，採用第三身視點，開放世界。遊戲舞台位於一個叫做「Omnistructure」嘅地方，呢度被各種生物同機械所佔據，玩家所扮演嘅「被遺棄之人」（Forsaken）為咗生存，喺呢個世界中一邊戰鬥一邊前進。

遊戲採用開放世界，但係根據製作團隊所講係會用「線性開放」，希望玩家能逐步體驗呢個世界帶比大家嘅興奮感覺。喺「Omnistructure」世界入面有各種生物、機械，但係佢地並非共存，而係會互相爭鬥、成長、改變及擴張區域，遊戲會有自己生成嘅生態系統食物鏈。例如你上一輪遊戲最強嘅獵食者，喺呢輪遊戲未必會出現，因為佢已經被其他生物所滅絕，整個遊戲都係同時間賽跑，因為敵人不但試圖超越你，仲會會超越其他競爭對手，不停狩獵、成長以保持自身存在食物鏈頂端，意味住每次遊玩都有新嘅生態系統新嘅體驗。（當然主要劇情所限，仍有部份區域係不變的）

戰鬥系統暫時無乜相關資料，喺之前放出黎嘅實機戰鬥影片入面，就見到同魂系遊戲大致相同，都係有輕、重攻擊、處決、潛行、翻滾、格擋等動作，同時所有動作都要扣減耐力，相信魂系玩家好快可以上手。基本動作以外，盾反就改為成功後直接擊倒敵人，法術表現就比較誇張，有類似時間停頓、凍結等多種類型魔法。

今次放出黎嘅影片最主要係同大家講遊戲已登錄 Steam，順便展示外星巨大 Boss，片尾仲有爬上超巨大蜈蚣身上，好有《汪達與巨像》嘅味道。

《Bleak Faith: Forsaken》未有正式上市日期，但係上市前似乎會有體驗版玩。遊戲會先係 PC Steam 上推出，根據官方所講喺正式推出有資源之後會出埋 PS4 同 Xbox One 版本，即係家用機係有排等。