講到創造生物，有返咁上下機齡相信都會諗起《四十六億年物語》，每次 Chok 到啲新生物出黎果種感覺真係好難形容。黎緊有一隻同樣玩創造生物嘅遊戲《World for Two》會喺 PC 上推出，之前喺其他平台上都得到非常唔錯嘅評價，未玩過嘅朋友留意啦。

《World for Two》由 Seventh Rank 開發，係一款平面像素風冒險遊戲。遊戲故事描述世界突然發生大災難，導致大半生物死亡，而世界上唯一倖免於難嘅人類就只有博士。由玩家所扮演嘅機械人係博士嘅助手，兩人携手創造出更多生物希望令世界回復生氣。

遊戲中玩家可以喺哋上收集自然能源，之後拎返去研究所就會變為人工 DNA，透過結合不同嘅 DNA 係前期就可以創造出阿米巴原蟲等原始生物。創造新嘅生物之後，玩家就可以喺佢身上採集 DNA，再同現存嘅 DNA 又或者其他生物結合就會有新生物，而且地上會因應生物增加改變地圖樣貌。另外，當生物種類增加後，不但會推進故事發展，更會擴大可探索範圍，亦即係生物嘅環境會更多元化。

《World for Two》本身喺 2015 年時推出，當時只有手機平台而且只有日文，後來到上年九月推出 Nintendo Switch 版本，一直都得到各方好評。等咗咁耐終於推出 PC Steam 版，仲對應埋繁體中文，將會於 7 月 16 日推出，有興趣玩家留意啦。