《機械人大戰》型式嘅 SLG 遊戲可謂歷久不衰，基本上機械人夠型、系統 OK 自然一堆人會買，加埋美少女就更加無得輸。由角川開發嘅新作《Relayer》有晒以上嘅元素，而且系統睇落仲幾唔錯添，今年有得玩，值得留意。

《Relayer》由 KADOKAWA GAMES 開發，係一款回合制戰略角色扮演遊戲。故事講述星曆 2049 年，人類遇見神祕外星生命體「傳繼者」，同時因為發掘古代銀河文明而覺醒為特殊能力者「星之子」。去到星歷 2051年，人類已經喺月球同火星上居住，並逐漸將生活圈拓展至木星，呢個行動引起意圖消滅宇宙「傳繼者」注意，為咗對抗佢地，繼承星之意志嘅「星之子」覺醒，以月面居住殖民地「阿提米斯」為舞台揭開序幕。

本作採用類似《機戰》嘅系統，都係逐個單位落指示行動嘅回合制戰鬥系統。由星之子搭乘嘅機體「星裝機」分為強襲、狙擊、坦克、斥侯四種類型，各類型機體嘅攻擊範圍同武器都有所不同，需要配合戰況思考部隊配置。另外喺呢隻遊戲有「仇恨值」，可以拉仇恨令敵方機體追住我方特定機體攻擊，可配合戰術再施以夾擊、引誘等戰術。

除咗機體，機師都有自己嘅職業。遊戲中有 20 種固有職業同超過 20 種以上嘅通用職業，可供各角色自由搭配。選擇職業可令角色特性更加獨特，並藉以在戰場上佔得上風。此外，還可用在戰鬥中獲得的點數來使職業成長。

除主線故事外，仲有隨故事進度解鎖嘅支線故事「星群艦航海記」等，總共收錄超過 80 個關卡。其中有深入描寫角色嘅劇情，亦有解開月亮誕生之謎等滿足科幻迷們好奇心嘅額外篇章，令玩家們能充份享受《Relayer》世界觀。

《Relayer》預計 2021 年推出，對應平台為 PS4、PS5，支援繁體中文。