講到 PS5 最令人期待嘅作品相信都係非《Horizon Forbidden West》（地平線：西方禁地）莫屬，話晒上集唔係靠媒體吹水講到天花龍鳳，係真材實料好玩之作，玩家自然對新作充滿期待。喺今日嘅 PlayStation 直播節目「State of Play」入面，就首次同玩家分享開發中嘅《Horizon: Forbidden West》實機遊玩畫面，睇完只能夠話真係值得等。

《Horizon Forbidden West》係 2017 年喺 PS4 上推出嘅《Horizon Zero Dawn》續集，係一款動作角色扮演遊戲，採用第三身視點，開放世界。今集延續上集故事劇情，發生喺上集故事後嘅六個月，主角亞蘿伊前往西方調查肆虐神祕枯萎病，同時展開新冒險。喺今次實機遊玩影片中，亞蘿伊派咗好朋友艾倫德去到舊金山遺跡到尋找一件遺物。過程中失手被學識覆蓋機器指令嘅提那科部族叛軍所擒，於是亞蘿伊隻身殺入敵陣勇救朋友順便展示新動作。

亞蘿伊嘅新動作有類似《隻狼》鉤縄嘅「拉鉤發射器」，除咗可以快速攀爬更可以拉自己接近另一高台，令節奏變得更快；「盾翼」就即係《薩爾達傳說 曠野之息》入面嘅滑翔傘，使用後可以喺高處下降同埋發動由天而降嘅突襲；「潛水面具」裝備後會得到無限探索能力。另外招牌「Focus」都有升級，新能力可標記自由攀爬區域，更能覆蓋更多機器指令，將機器變成坐騎或戰鬥幫手。

戰鬥部分，影片內展示長矛近戰，有新組合技，可配合弓打出一套連技。弓就同上集一樣可以裝各種箭，另外仲有彈弓+黏性彈有短暫癱瘓敵人效果；爆炸矛有大範圍攻擊；煙霧彈令敵人失明等等，全部都可以用工作台升級。新武器外，當然有新敵人，空中嘅「日翼者」、地上嘅「爪步者」同「撼牙獸」，水中嘅「牙口獸」仲有體積較小卻不容輕視嘅「挖掘者」等等。

《Horizon Forbidden West》現時處於開發階段尚未有推出日期，對應平台為 PS5、PS4。