喺極權政府統治下，就算乜都無做過都有機會面臨牢獄之災，更甚者被困入集中營，有無命返出黎都唔知。雖然早前有位名人講過「坐監係另一種逃避」，令人茅塞頓開，不過我就相信無乜人會自願被剝奪自由。《Dissident: Frostland Escape》就係一款講述喺極權統治下嘅普通人，被困入集中營勞改同時想辦法逃離此地尋求自由嘅故事，而且設定上仲非常真實。

《Dissident: Frostland Escape》由獨立團隊 Tequilabyte Studio 製作，係一款生存潛行冒險遊戲，採用俯視視角，開放世界。遊戲背景設定於一個被極權政府採用高壓手段管治嘅地方，喺冰天雪地寒冷地區興建集中營，將佢哋認為嘅反動分子捉入去進行嚴苛體力勞動以及施以酷刑對待。扮演被壓逼人民嘅你，就要選擇你想要嘅行動，係默默忍受定係冒險逃離，命運由你決定。

喺呢隻遊戲入面最特別嘅地方，就係玩家所控制嘅人物並唔係咩超級英雄可以一個打廿個，佢哋只不過係有唔同職業嘅普通人，例如係老師、政治人物、士兵等等，各自有自己專長（可能係面臨危險時手拉手坐低），而且部份能力會喺逃生過程時有所幫助。不過因為集中營外面係冰天雪地，喺呢個咁惡劣嘅環境下生存得幾耐就要睇你身上嘅物品同技能決定，加上雪地有熊出沒，後面又有軍隊追捕，要存活真係唔關單。

另外，本作有個系統叫做「思想與瘋狂」，暫時未有相關資訊，有可能係位於集中營時面臨壓力嘅指標，亦有機會係野外極端環境下，同大自然、霜凍、飢餓戰鬥下嘅心理強度，無論係邊樣都非常吸引，詳細就要留待官方公佈啦。

《Dissident: Frostland Escape》預計於今年內上市，對應平台為 PC Steam。